For verdas fattige små er draumen viktig. Ingenting skapar vel draumar som ein fotball og trøye med nummer på ryggen. I landsbyen Pueblo Nuevo har alle dei små spelarane høyrt om Erling Braut Haaland. Dei spelar på den «norske» banen som i vinter blei kåra til Cubas mest velhaldte. Det var SPAR-sjef Odd Arne Skjeggedal på Evje som starta det lille fotball-eventyret då han fekk med seg næringsdrivande på Verksmoen og sendte over ein motor-grasklyppar, ballar og trøyer. Klubbhuset, det einaste på Cuba med norsk reklame, er også finansiert frå Noreg.
