Når sentrumsbygg står tomme

Leiar i Setesdølen 15. november 2018:

Bygland sentrum har slite med altfor mange tomme lokale etter at banken har trekt seg ut sakte, men sikkert, og lensmannskontoret er også på hell etter omlegging og sentralisering. I desse dagar ser det også ut til at produksjonsbedrifta Glashytta held på å avvikle for godt. Det siste er synd på så mange måtar. I tillegg til å representere eit par viktige arbeidsplassar midt i bygda, har Glashytta også vore turistkontor og ikkje minst eit reisemål for mange som har lagt sommarturen til Bygland. Glashytta har vore eit viktig element i arbeidet for å skaffe aktivitet nok for dampbåten ”Bjoren”. Med glasblåseriet i full sving har ein hatt noko å vise både turistar og andre på gjennomreise. Sjølve produkta har også gjort sitt til å profilere Setesdal. Alt i alt er det difor mange grunnar til at denne bedriftsnedlegginga er ekstra trist.

Den største utfordringa for ansvarlege styresmakter i Bygland må difor vere å legge til rette for at tomme lokalitetar kan fyllast opp igjen av både offentleg forvaltning og gjerne nye kommersielle aktørar. Vinteren går fort, og det er lite hyggeleg å tenkje seg ein vår og sommar med mindre attraksjonar på Bygland enn det ein har i dag. Dampbåten ”Bjoren” er heilt avhengig av å kunne presentere eit fullverdig besøkstilbod for å halde drifta i gang,  og lokalt næringsliv frå butikkar til bensinstasjon treng så mykje ny aktivitet som råd er.

Med tanke på dei tomme kontorlokala burde presset setjast inn for å skaffe seg noko av det som ligg i regjeringa si påståtte desentralisering av statlege arbeidsplassar. Bygland bør kunne strekkje seg langt for å ta imot både sysselsettingsmessige almisser frå sentralt hald - og gjerne noko meir enn det.