Åse Rike har vore med sidan starten: Jolemesse i 40 år
Normisjon si jolemesse i Valle har tradisjon tilbake til 1982. Åse Rike har vore med heilt sidan starten, og er klar som arrangør av si 40. messe til helga på Sæbyggjen.
– Foreininga vart stifta i januar 1982, og fyrste jolemessa var andre adventshelga same året. Den gongen var me ti personar som stelte i stand messa, fortel Åse Rike.
Fleire har gått bort, og ho er den einaste som har vore med alle gongene sidan starten.
Artikkelen held fram under annonsen.
– Det har variert kor mange som har vore med. Men nå er me fem i ein eigen jolemessekomité, seier Rike.
I komitéen er også Rønnaug Torvik frå Bykle, Bente Bjørgum frå Rysstad, og Lisbeth Hurthi Homme og Liv Åkre Trydal frå Valle. Rike ventar at det også i år blir god oppslutning om arrangementet.
– Det pleier alltid å bli fullt, seier ho.
Flotte gevinstar
Hovudgevinstane er dalebukse og stakkar til 4-7 år, men det er også flotte gevinstar som grill, strikka slumreteppe, knivsett og dyner og puter. Bøkene til hovudlotteriet har ligge ute ei stund, men det blir i tillegg vanleg åresal og basar på Sæbyggjen. God servering lovar ho også.
– Det blir matsal med suppe og eplekaker, og kaker og kaffi. Så blir det andakt og familiemøte fortel Rike og legg til:
– Folk kan kome og gå heile dagen som dei vil.