Borna flokka til open skøytebane
Store og små tørka støv av skøytene, og brukte helga til både ishockey og leik på isen i strålande sol. Skøytebanen på Evje opna for aktivitet på fredag.
Lett som fjør suste borna på hockeyskøyter mellom dei to måla på skøytebanen i Evje sentrum i strålande desembersol. Dei to vaksne på isen, Pontus Lexberg og Margrethe Roel Omland prøvde å halde tritt med den yngre garde som jakta ishockeypucken med den største iver.
Borna såg ut til å kjenne på både konkurranseinstinkt og begeistring over å endeleg kunne bruke fridagar med skøytene på. Dei unge ishockeyspelarane hadde kun tid til ein kjapp saftpause og ein liten prat med Setesdølen, før skøyteblada igjen klappa mot isen.
