Her kjem eit lite overblikk over saker som har vore blant dei mest lesne på www.setesdolen.no i 2023. Både kronprinsbesøk, kommune- og fylkestingsval, og arbeidsliv og kvardagsliv i Setesdal og Åseral interesserer lesarane våre.
Ved starten av året fatta mange interesse for utspelet frå byggmeister Vidar Smeland om at Evje og Hornnes driv næringsfiendtleg politikk. Han trekte seg frå styret i Evjemoen Næringspark AS etter kommunestyrevedtaket om tursti gjennom Odden camping. Frå næringslivet i kommunen kunne ein også lese om Anne Grete Bjærum som har drive frisørsalong på Evje i 40 år, og om klesbutikken Kleshjørnet som la ned drifta.
Frå det politiske liv i Bygland las mange om Dagsrevy-innslaget om rovviltforvaltning som vart teken opp i kommunestyret, og i Bykle var det stor interesse rundt saka om at hotellet kanskje skulle bli rusinstitusjon.
Artikkelen held fram under annonsen.
Søkjarlista til stillinga som ny brannsjef i Setesdal vekte stor interesse i februar, det same gjorde rapporten om ungdom sitt skulemiljø i Åseral der dobbelt så mange som i landsgjennomsnittet seier at dei kjenner seg mobba.
NM i bakkedrag
I vårmånadane las flest om Kjell Rune Heia og Skild som auka bemanninga frå 3 til 14 i løpet av eit år, om underskot for Setesdal Bilruter i 2022, Nomeland Maskin som etablerte seg på Evje og rekorddeltaking under eit vellukka NM i bakkedrag i Åseral.
Det var også interesse for politikk i Valle og kjøp av bustadeiningar i utbyggings- eller rehabiliteringsprosjekt for å gjere noko med bustadmangelen i kommunen.
Kronprinsbesøk
Kronprinsbesøket i Bykle førte til mange lesne saker om både UNESCO-element og meir sporty opplevingar dei fekk under turen til Setesdal. Rv9-utbyggingar vekkjer interesse året rundt, men også ny fv42 mellom Hornnes og Eiken vart ei mykje besøkt sak.
Både Pride-markering på Evje og filmselskap med ambisjonar på Bygland var mykje lese i juni, og i juli ville mange lese meir om den nye politistasjonssjefen i Setesdal og Holum-funnet i Valle der ekteparet Holum Heiland fekk seg ei overrasking då dei skulle renovere huset på garden. Frå Valle fekk ein også artikkelen om Valle kommune vs. Staten i støylsbusaka som engasjerte.
”Ole Ivars” på Bygland
Då Ole Ivars-vokalisten Tore Halvorsen besøkte Byglandsheimen fekk Setesdølen ei av dei mest lesne sakene på nett gjennom heile året. Valle Skyrace, det fyrste i historia, vekte engasjement hos fleire enn dei mest sporty av lesarane. Fem personar på skuter i Setesdal Vesthei rømde frå politiet i april, og vart i august sikta for brot på naturmangfaldlova.
Heile sommaren og fram til midten av september handla det mykje om kommunevalet i Setesdal. Det vart skarpe ordskifte, ikkje minst i etterspelet då verva skulle fordelast. Sidan har politikarane fått fokusere meir på det dei skal. I oktober las mange om sauesjåmarknaden i Valle og om politietterforskinga i Bykle etter at fleire foreldre meldte kommunen til politiet for brot på opplæringslova.
Jo Breivegen i Hovden Hytteservice fekk mange auge retta mot seg gjennom året, mellom anna i saka om investeringar for 100 millionar i nybygg på Hovden. Seinare i november kom saka om at Zephyr vil anlegge vindkraftanlegg på Gautestad i Evje og Hornnes, om Bertha Haraldstad som for 85 år sidan starta det som i dag er Pernille Kafé på Evje og om det store behovet for utlevering av matkassar frå Norkirken på Evje.