Generasjonsleikar i Bygland
– Me vil engasjere folk på tvers av generasjonar. Her kan besteforeldre og barnebarn endeleg stille på same lag, seier kulturleiaren i Bygland Anne Fauske etter at Bygland er plukka ut til å arrangere Generasjonsleikar til hausten.
Generasjonsleikane handlar om å vere aktive saman. Born, foreldre og besteforeldre skal finne saman i leik og idrett. Nyleg vart Bygland ein av 25 kommunar her i landet som arrangerer Generasjonsleikar i år.
Kulturleiaren i Bygland har alliert seg med den alltid så villige Gro Tove Frafjord Sandnes i Bygland husflidslag. Saman vil dei legge Generasjonsleikane til arrangementet Lislefarmen som etter coronapause er i gang att laurdag 2. september i år.
Artikkelen held fram under annonsen.
Det skjer på det idylliske museumsområdet med gode fasilitetar og rikeleg parkeringsplass.
Utvidar Lislefarmen
– Der vil me utvide Lislefarmen med ei rekke nye aktivitetar, nye ballspel og andre utfordringar i tillegg til tradisjonsrike øvingar som skyting, øksekasting, natursti og mangt anna som generasjonar kan vere saman om å delta i, seier Gro Tove Frafjord.
Målet no er difor å appellere til andre lag og foreningar i kommunen om også å bli med på samarbeidet. Alt frå Jeger og fisk til 4H, skyttarlag, bygdekvinnelag og mange andre er velkomne til å bli med.
– Poenget er at dei presenterer tilbod om aktivitetar som gir muligheter for engasjement og meistring, og som stimulerer konkurranseinstinktet, seier Gro Tove Frafjord Sandnes.
Biljardfotball
– Har du høyrt om biljardfotball? Det er eit nytt tilbod som kan bli presentert under årets Generasjonsleikar i Bygland, seier Anne Fauske og ber interesserte lag og foreningar legge fram tilboda sine.
Også lokalt næringsliv skal få ein sjanse til å vere med som sponsorar viss det er interesse for det.