Gir bort 90 juletre til dei som treng det
Martine Pullen på Byggmax Evje fortel at butikken gjerne vil donere opp mot hundre juletre til personar og familiar som treng det. – Me er glade for å kunne bidra til å gjere jula litt lysare for dei som treng det mest, seier Martine Pullen, dagleg leiar ved Byggmax Evje.
I fjor donerte butikken nokre juletre til ukrainske flyktningar. Martine Pullen håpar nå at så mange som muleg vil kome til varehuset på Evje for å hente eit juletre.
– I år utvidar me initiativet til å omfatte fleire i lokalsamfunnet som har det tøft. Me er heldige som har fått bistand av Norkirken til å nå ut til dei som trenger det, seier Pullen.
Artikkelen held fram under annonsen.
Familiar som får matkasser fra Norkirken vil få ein kupong til eit gratis juletre hos Byggmax Evje.
Vil bidra
I tillegg skal Byggmax Evje også donere juletre gjennom NAV som distribuerer dei til ukrainske flyktningar og andre i lokalsamfunnet som strevar økonomisk.
– Me veit at det er mange som har det vanskelegare i år, difor prøver me å bidra der me kan, fortel Frederik Maurits Staudt, regionsjef i Byggmax.
Han fortel at Byggmax har som mål å bidra positivt til samfunnet.
– Me ser dette som eit høve til å gje tilbake til dei som treng det mest. Det er mange tre, og me ønskjer å nå ut til alle som treng litt ekstra hjelp i jula, seier Staudt.
Straumpris og prisstiging
Irene Åtland ved Norkirken er glad for at Byggmax hjelper der dei kan.
– Me har sett utviklinga i lokalsamfunnet, og det er klart at stadig fleire har det veldig tøft, spesielt i juletida. Straumprisen og den generelle prisstiginga et av budsjetta til mange, seier Åtland.
Kvar veke bidrar ho til lokalsamfunnet med andre frivillige og deler ut matkasser til 89 personar og familiar i Evje og Hornnes.
Artikkelen held fram under annonsen.
– Me er ikkje ein stor kommune, så eg trur at 90 juletre vil kunne glede mange som ikkje har råd til å unne seg det til jul, seier Åtland.
