TØMMER: Anders Dalseg trur det kan bli stas å vere den som leverer treet til dei nye Hylestadportalane i Setesdal stavkyrkje. No etterlyser han gamal furu til prosjektet.

Har du ei 250 år gamal furu? Då kan den hamne i Setesdal stavkyrkje

Skal Setesdal stavkyrkje bli bygd, trengs det mykje gamal furu. Anders Dalseg er interessert i både store og små furutre med mykje kjerneved. Han ber folk som har, eller kjenner til gamal skog, om å ta kontakt.

Medan arbeidet med å finansiere Setesdal stavkyrkje går sin gang er Setesdal bygningvernsenter og Anders Dalseg i gong med å finne passande tømmer til det desidert største prosjektet innan tradisjonshandverk her i området.

Han vil gjerne at folk som har, eller kjenner til område med gamal furuskog tek kontakt.

Artikkelen held fram under annonsen.

– Utfordringa er å skaffe riktig tømmer, og særleg med rett kvalitet. Furu tyder eigentleg tre i vekst, og det er mogen furu me er ute etter. Sidan kvaliteten endrar seg med alderen, er det veldig gamle tre som er 250 år og eldre me helst vil ha, seier han.

Nye Hylestadportalar

Det er både store og små tre som trengst for å skaffe tømmer til stavkyrkjeprosjektet. Dei treng mellom anna eit spesielt stort og fint tre som skal bli til ein kopi av dei velkjende Hylestadportalane.

– Det må vere 75 centimeter i diameter og med mykje kjerneved. Eit spesialtre kan ein kalle det. Elles trengst det mykje tømmer med ein diameter på 50 centimeter frå brysthøgde og nedover. Så det er ikkje berre store dimensjonar, seier Dalseg.

GAMAL: Anders Dalseg syner tømmeret frå ei 500 år gamal furu som vart hogd i Vierdalen i Valle. - Det var det absolutt eldste furutreet som var registrert hjå Nasjonalmuseet i København, seier Dalseg.

Til midtskipet på kyrkja er det rekna at dei må ha tak i minst 410 tre av gamalt furutømmer. I tillegg kjem tømmer til svalgang og takspon på kyrkja.

– Det er meir kjerneved på gamalt tømmer og utveden har også endra eigenskapar. Alderen er ein måte å finne rett kvalitet på tømmeret, legg han til.

Hogst til hausten

Fyrste hogsten er planlagt til hausten, då 2024 er fyrste byggjesesong og det trengst ein del tre til då.

– Me veit om ein del, men det er mykje tømmer me treng. Planen er å hogge dei fyrste trea på seinhausten i år, og at det blir hogd i fleire år framover.

Han vonar dei får tak i nok tømmer lokalt i Setesdal og at dei ikkje treng skaffe tømmer utanfor distriktet.

Artikkelen held fram under annonsen.

– Eit mål er at tømmeret skal vere frå Setesdal, sidan stavkyrkja skal bli bygd her og skal heite Setesdal stavkyrkje, legg han til.

Dalseg har erfart at slike gamle furutre ofte står på utilgjengeleg plassar og at dei planlegg for mykje stykkhogst rundt forbi for å få tømmeret dei treng.

– Det er ofte tre som står att i utilgjengelege område, og det blir ein stor jobb å få fram desse. Me vil kjøpe einskild tre på rot og tilbyr grei betaling for dei rette trea, seier han.

Dalseg seier også at dei er interessert i såkalla rotkne. Det vil seie tre med ei boga rot som er veldig slitesterk. Desse treng dei 200 av.

FURU: Trea dei er ute etter er gamal furu som har ei flat krone på toppen og med ikkje altfor mykje grøne greiner. - Dei er gamle og veks dårleg, og liknar på det karakteristiske furutreet på fyrstikkasken, seier Anders Dalseg.