Leiv Rygg Langerak til minne

Det var med sjokk og stor sorg eg mottok meldinga om at tidlegare Byglands-ordførar Leiv Rygg Langerak har gått ut av tida så alt for tidleg. Som tidlegare ordførarkollegaer gjennom ei årrekke er minna om Leiv og samarbeidet me hadde mange og gode.

I dag kjem dei til meg, alle saman. Når ein får meldingar som den om Leiv, då er det dei harde realitetane i livet ein møter. Det er sterkt.

Leiv Rygg Langerak var ein mann det var lett å røe med. Han var kjapp i replikken, hadde glimt i auga og sette pris på ei lett og ledig tone. Om det no var i samband med kommunale selskap, interkommunalt samarbeid eller bare det at me var ordførarar i same dalen, dialogen var alltid enkel og likefram.

Ryddig og konstruktiv

Leiv var ein ryddig og konstruktiv mann. Visst hadde han sine eigne meiningar, og sanneleg våga han å

stå for dei – men konstruktiv og løysingsorientert var han alltid. Engasjert, oppteken av å lytte, og å få resultat. Det er rart med det, som ordførarar i relativt små kommunar i eit dalføre der «alle kjenner alle» kjem ein sjølvsagt nærare inn på kvarandre enn i meir folkerike strok. Det prega då også både dialogen og samarbeidet – me er ikkje fleire her i dalen enn at det i noko større perspektiv nesten er som familie å rekne, viss ein kjem frå Setesdal!

Tankane våre no går til familien som sit att. Tunge stunder, sorg og sakn kjem til å prege kvardagen. Men også takksemd og gode minne. Dei gode minna deler me med dei alle – og me tenker på dei. Eg lyser fred over Leiv Rygg Langerak sitt gode minne.

Jon Rolf Næss

19. september 2022