Rekordmange stilte til start då Åseral arrangerte NM

Same dag som dei aller fleste skituristane pakka bilen for å forlate påskefjellet for dette året, overtok dei motordrivne skia alpinbakken. Det var duka for NM i bakkedrag i Bortelid, noko som verkeleg må kallast ein suksess.

– Scooterklubben er svært nøgd med oppmøtet. Me hadde eit håp om å få rundt 100 påmeldte, men totalt er det heile 176 personar som stiller til start! Deltakarane kjem stort sett frå Åseral, Hægebostad, Setesdal, Sirdal og Telemark. Det er også rekordpåmelding i dameklassen, samt svært mange born som er påmelde, seier mangeårig leiar for Åseral Snøscooterklubb, Tom Handeland.

Han er svært glad for at Åseral-klubben fekk arrangere det aller fyrste NM i bakkedrag.

Tidkrevjande planlegging

Det myldrar av liv kring varmestova og familiebakken på Bortelid. Folk frå heile distriktet har møtt opp for å sjå på både originale og nytrimma skutarar som freser oppover alpinbakken. Vêrgudane må seiast å ha vore rause med skuterentusiastane denne dagen, for dei store nedbørsmengden som var meldt, let heldigvis vente på seg. Det er særleg arrangørane glade for.

– Me jobba i 12 timar i går, i tillegg til at me møtte opp for meir klargjering klokka 6 i dag tidleg. I tillegg kjem alle timane i sjølve planlegginga. Det tek tid å gjere klart til eit så stort arrangement. Me har også fått god hjelp frå foreldra til borna som deltek i dag, seier styremedlemmane i Åseral Snøscooterklubb, Vilde Thorsland Lauen og Terje Verdal.

Dei trivst godt i miljøet, og ønskjer gjerne at fleire melder seg inn.

Aktiv klubb

Tidlegare denne sesongen har klubben skipa til løp i Eikerapen og på Verdal. I tillegg har dei i ei årrekke arrangert skredkurs, Barnas dag og fellestur til Lordehytta. Arrangementa har vore svært populære. Og sjølv om våren nærmar seg, er det ikkje tid for medlemmane å leggje skuterhanskane på hylla riktig endå.

Førstkomande laurdag er det løp i Brokke, før det avsluttande løpet blir halde i Haukeli 29. april. Men sjølv når snøen forsvinn, legg ikkje klubben seg i dvale. I fleire år har klubben arrangert populære vanndrag på sommarstid. I fjor sommar var klubben med på å arrangere Barnas dag på Ørevatn for 65 deltakarar som fekk leike seg gjennom ulike aktivitetar. Dagen vart arrangert saman med prosjektet Gøy på landet Åseral, som er støtta av Gjensidigestiftelsen, og leda av Åseral Frivilligsentral og Åseral ungdomsråd.

Mange unge deltakarar

I klassen Ungdom 13-16 deltok mellom anna Ella Tonette Flodquist frå Moisund og Andine Telhaug frå Åseral. Dei er begge oppvaksne i skuterkulturen, og har tidlegare vore deltakarar på ulike barneløp.

– Me vil gjerne ha med endå fleire jenter på løp! Det er så moro, og me trur mange vil få sansen for sporten om dei berre prøver seg, seier dei.

Eit anna ungt tospann som er særs skuterinteresserte, er åsdølane Daniel Honnemyr og Brynjar Smeland. Dei er, trass sin unge alder, drivne deltakarar i skuterløp. Sidan dette er ein heilt spesiell dag, vel dei å dele sine aller beste tips for alle som skal køyre løp: ha trua og ha på hjelm!

– Eg har vore med i alle løp denne sesongen. Det er ein nokså dyr og tidkrevjande hobby, men skutermiljøet er utruleg inkluderande og sosialt. Ein lærer mykje når ein skrur og deler tips med andre, seier åsdølen Trygve Eikerapen Kjellby.

Som deltakar i fleire klassar låner han ein Lynx av Tom Handeland, men skuteren har litt ekstra historie med seg. Tidlegare eigar har nemleg vore Janne Tapio, finsk verdsmeistar i skutercross på tidleg 2000-tal. Tapio vann mellom anna EM i Valle i 2002.

Jan Erik Uppstad frå Sordal stiller i tre ulike klassar, og fortel at han har brukt om lag 15 timar på å gjere klar sin Ski-Doo 1200 Turbo før dagens løp. – Det tek lang tid, men det er moro. Me kjem mannsterke frå Hylestad Snøscooterklubb til Bortelid i dag, og mange av desse er ungdom. Slike arrangement er bra for rekrutteringa!

Sjå fleire bilete:

Zoom Førre Neste