Rusta for alle typar hendingar

I heile Agder er frivillige frå Røde Kors i beredskap, men i påska er endå fleire på vakt i vinterfjellet. – Last ned Varsom-appen, oppmodar hjelpekorpset dei som skal ut og ferdast i fjellet.

Nedre Setesdal Røde Kors Hjelpekorps kjem til å ha base på Høgås, Vennesla RKH held til på Brokke og Kristiansand RKH skal vere på Hovden. Men også Norske Redningshunder i Agder har ekvipasjar klare for både leiteaksjonar og snøskred, og Bykle Fjellredning og Valle Fjellredning er i beredskap om uhellet skulle vere ute.

Lokalkjende

–Det er viktig å understreke beredskapen også Bykle Fjellredning og Valle Fjellredning står for. Dei er lokale og i området heile tida, også når Røde Kors har reist att, seier Karina Lislevand, operativ leiar i Nedre Setesdal Røde Kors Hjelpekorps.

Samarbeidet er det som skal til for at folk skal kunne føle seg trygge i fjellet. Og dei frivillige er på øvingar og på kurs for å kunne gjere best muleg innsats når behovet melder seg.

–I vinter har me hatt mange på ulike kurs og øvingar for å vere best muleg rusta for alle typar hendingar på vinteren, fortel Lislevand.

Kameratredning

Ho fortel at ved skred så er den aller viktigaste og fyrste ressursen kameratredning. Men for å unngå å hamne i skredutsette område, er det viktig å bruke Varsom-appen og orientere seg om vêr på førehand.

– Dette kan forandre seg mykje, og difor er det viktig at folk oppdaterer seg om føret før dei reiser ut, seier ho.

Men folk som er i Setesdal i påska skal kjenne seg trygge på at mange frivillige er klare for innsats, og samarbeidet med naudetatane er godt om det skulle skje noko.

– I Agder er det 6 godkjende lavineekvipasjar. Desse kan også bli flydd inn til eit skredområde med luftambulansen, seier Lislevand og legg til:

–Me håpar på ei flott påske for alle, og at folk følgjer trygge vegar og unngår skredfarlege område. Last ned Varsom-appen og følg med der for varlsar om området du har tenkt å ferdast i.