Det er ingen sundagsskule i Bykle rådhus. I samband med ei varslingssak har ein tilsett i kommunen gjeve Agder Kommunerevisjon IKS skjulte lydopptak av kommunedirektør Karina Sloth Grindland. Ei anna kjelde har levert inn skjulte filmopptak av kommunedirektøren.

Skjulte lyd- og filmopptak av kommunedirektøren i Bykle

Ein tilsett i den administrative leiinga i Bykle kommune har gjort skjulte lydopptak av kommunedirektøren i Bykle i samband med ei varslingssak. Det kjem fram i ein rapport frå Agder Kommunerevisjon IKS. Ein annan person har filma kommunedirektøren i det skjulte under politiske møter.

Bakgrunnen for rapporten er ei varslingssak for ei tid tilbake. Tre tilsette i kommuneadministrasjonen leverte via hovudverneombod Bettina Schaanning varsling om kommunedirektør Karina Sloth Grindland. I varslingane var det påstandar om alt frå trakassering til mangelfull respekt for tilsette og sviktande oppfylgjing i det daglege.

Bykle kommune hyra inn Agder Kommunerevisjon IKS for å undersøke og vurdere innhaldet i varslingane. No har revisjonsdirektør Tor Ole Holbek og forvaltningsrevisor/jurist Jarl Birkenes Gjessing levert ein rapport som kommunestyret i Bykle får sjå for første gong under eit lukka ekstraordinært kommunestyremøte måndag 12. april.

Artikkelen held fram under annonsen.

Skjulte lydopptak

I rapporten kjem det altså fram at to personar har gjort skjulte lyd- og filmopptak av kommunedirektøren. To lydopptak skal vere frå private samtalar mellom kommunedirektøren og ein av varslarane. I rapporten kjem det fram at «ei anna kjelde» har levert inn to filmopptak av kommunedirektøren under politiske møter i kommunen. Kven denne kjelda er seier rapporten ingenting om. Ein del av materialet er levert til revisjonen som noko av grunnlagsmaterialet for varslinga.

I innleiinga til rapporten kjem det fram at ei av dei tre sakene som vart kalla varsling var meint som ei melding om avvik. Revisjonen har difor sett på bare dei sakene som var meint som varsling.

Alvorlege påstandar

Ein av dei tilsette i den administrative leiinga i Bykle kommune har levert varsel om kommunedirektøren med påstandar om trakassering. Vedkomande meiner også at kommunedirektøren har heldt tilbake relevant informasjon den tilsette skulle ha hatt, og at kommunedirektøren ikkje set seg inn i saker før møter. Vedkomande har også skrive at kommunedirektøren ikkje har respekt for dei tilsette si fritid, og fleire kritikkverdige punkt.

Den andre tilsette som har levert varsel meiner seg også trakassert av kommunedirektøren. Vedkomande har i sitt varsel vist til destruktiv leiing frå kommunedirektøren, beslutningsvegring, detaljstyring og dessutan sviktande kommunikasjon. I begge varslingane kjem det fram at dei tilsette føler seg lite respekterte av kommunedirektøren. Revisjonen har i sitt arbeid både snakka med varslarane og kommunedirektøren om alle punkta i varslingane, og har altså passa på at både varslarane og kommunedirektøren sin versjon punkt for punkt har vore med i vurderingane i rapporten.

Ikkje eitt dokumentert tilfelle av «kritikkverdige forhold» i høve arbeidsmiljø og samarbeid

Agder Kommunerevisjon IKS har gjort ei vurdering og analyse kring kvar påstand i varslingane sett opp mot alle partar sin versjon og det relevante lovverket. Revisjonen har ikkje avdekka eit einaste døme på ”kritikkverdige forhold” på punkta som omhandlar forholdet mellom kommunedirektøren og varslarane. Revisjonen skriv at det i fleire tilfelle er dokumentert høg belastning på dei tilsette, men ikkje meir enn ein må rekne med når ein har ei leiarstilling i kommunen.

Revisjonen har likevel konkludert med kritikkverdige forhold i tilknytning til innkjøp i Bykle kommune. I rapporten frå Agder Kommunerevisjon IKS står det at kommunen har brote både anskaffelsesforskrifta og kravet til konkurranseutsetting. Brota, som i rapporten blir klassifisert som ”kritikkverdige forhold”, har kome i samband med to ulike situasjonar. Bykle kommune har kjøpt tenester frå konsulentfirmaet Arkicon. Totalt har verksemda fakturert og fått utbetalt kring 2.2 mill. kr. for arbeid frå 20. mai 2019 til september 2020. Konsultasjonen har handla om byggkonsulenttenester for planavdelinga i Bykle kommune, og selskapet har fått 2000 kr. timen for tenestene sine. I og med at summen vart så høg skriv revisjonen at oppdraget skulle ha blitt lyst ut på anbod.

Agder Kommunerevisjon IKS har ikkje avdekka kritikkverdige forhold i høve forholdet mellom kommunedirektør Karina Sloth Grindland og dei to kommunalt tilsette varslarane. Revisjonen meiner likevel at kommunen ved to høve har brote lover og forskrifter knytta til innkjøp og konkurranseutsetting.

Arbeidsmiljøundersøking

Også i samband med ei arbeidsmiljøundersøking meiner revisjonen at Bykle kommune har brote innkjøpsreglane. Ein psykolog som i utgangspunktet var hyra inn som ordinær psykolog i kommunen gjekk i oktober 2019 inn i avtale med kommunen om ”Prosjekt arbeidsmiljø og ledelse”. Avtalen skulle gjelde frå 1. oktober 2019 til 31. mars 2020. Prisen for oppdraget var 98.400 kr. i månaden. Kommunen meinte at ein ikkje måtte lyse ut oppdraget då det var resultat av ein akutt situasjon med fleire oppseiingar og fare for sjukemeldingar blant dei tilsette i kommuneadministrasjonen.

Frå november 2019 og juni 2020 har psykologen levert inn fakturaer på totalt om lag 730.000 kr. Revisjonen skriv at det skal mykje til å nytte unnataksbestemmelsen i ein akutt situasjon for å omgå kravet om konkurranseutsetting. Agder Kommunerevisjon IKS konkluderer med at anskaffelsesregelverket er brote, og klassifiserer saka som kritikkverdige forhold. I begge tilfella skriv revisjonen at ingenting tyder på at innkjøpa er gjort i strid med fullmakt frå kommunestyret.

Artikkelen held fram under annonsen.

Kommenterer skjulte opptak

I rapporten tar revisjonen for seg dei skjulte opptaka i saka.

– Revisjonen vurderer det som svært inngripende at det er gjort skjult lydopptak, der hensikten blant annet er å ”vise/framheve manglende informasjon om etterlevelseskontroll. Dette vil kunne medføre redusert samhandling og vanskelige arbeidsforhold mellom kommunedirektøren og vedkommende som har gjort opptak, heiter det i rapporten.

Kommunestyret i Bykle får altså sin første gjennomgang av rapporten måndag 12. april.