-Har kontroll på smittesituasjonen

-Vi har fortsatt kontroll lokalt. Det slår ordførar Svein Arne Haugen fast i ei nyttårshelsing til tilsette i kommunen og politikarkollegaer.

Bakgrunnen er at han hadde planar om å gjennomføre eit ekstraordinært kommunestyremøte torsdag på lille nyttårsaftan for å skaffe seg nødvendig ryggdekning for eventuelle smittetiltak i skular og barnehagar når desse er i gang igjen på nyåret. Nå er situasjonen i Evje og Hornnes så godt under kontroll at det planlagde kommunestyremøtet er avlyst.

I staden vart det i dag onsdag 29. desember halde fagmøte med oppvekst/helse og kriseleiinga i kommunen der konklusjonen vart at ein ikkje vil sette i verk tiltak utover det som er bestemt frå nasjonale styresmakter.

Ordføraren slår fast at verken den nasjonale smittetrenden eller den lokale har forverra seg.

God vaksinasjonsdekning

-Lokalt har me svært god vaksinasjonsdekning som gir god beskyttelse. Me har ikkje fråvere frå tilsette i skule/barnehage som påverkar skulestart, slår han fast.

Kriseleiinga ønskjer difor ikkje å kome med forslag/behov for lokale forskrifter. Konklusjonen er at ein vil halde seg til nasjonale føresegner.

Oppsummering

Ordføraren oppsummerer den lokale smittesituasjonen slik:

Me hadde før jul to utbrot.

Eit utbrot i tilknytning til 5. klasse med Deltavarianten av viruset.

Eit utbrot i tilknytning til 8. klasse med Omikronvarianten av viruset.

Utbrotet i 5. klasse har heilt stoppa opp, utan vidare smitte.

Utbrotet i 8. klasse har spreidd seg til husstandsmedlemmer til elevane.

Dei siste smittetilfella i kommunen er i all hovedsak Omikron.

Det er i dag (onsdag) 7 personar i isolasjon i kommunen, og 11 i karantene.

Dagens morgonrapport (testresultater) frå sjukehuset gav inga endring på dette.