Evje og Hornnes kan bli best på integrering

- Regjeringa har kome med ein ny integreringsstrategi der målet m.a. er å få våre nye landsmenn raskare ut i arbeid, seier Jan Kristensen i Evje og Hornnes Høyre.

Han viser til at dei kommunane som er best på integrering skal prioriterast ved busetting.

-Evje og Hornnes må også bli betre på dette området, seier Kristensen som vil ta opp saka i ein interpellasjon til ordføraren i neste kommunstyremøte.

Kristensen understrekar i interpellasjonen at det er viktig å integrere nyankomne flyktningar så raskt som råd er, både av omsyn til den enkelte og familien. Det blir ein styrke for borna å ha foreldre som har venner og kontaktar i nærområdet.

-Dette er også viktig for kommunen, fordi me får personar som bidrar til kommunebudsjettet i staden for å ta imot kommunale stønader, seier Kristensen. For Norge som nasjon meiner han også at dette er viktig fordi me veit at me treng arbeidskrafta frå dei som kjem hit til landet, også om me skal greie å finansiere den velferda me gjerne vil ha.

Mykje sosialhjelp

I Evje og Hornneskommune utgjer flyktningar eller tidlegare flyktningar/asylsøkarar ca. 13,5% av det samla innbyggjartalet. Likevel utgjer denne gruppa heile 46% av sosialhjelpsmottakarane i 2017, ifølgje NAV.

Kristensen viser til at i denne gruppa får heile familiar sosialhjelp, og dei blir i systemet lengre enn nordmenn. Han trur språk, kulturskilnader, helse og utdanning er dei største utfordringane.

-NAV sin statistikk viser også at utfordringane lett går i arv frå foreldre til barn, seier Kristensen.

Vil gjerne kome i arbeid

I interpellasjonen til ordføraren meiner han at kommunen ikkje kan slå seg til ro med denne utviklinga.

-Fordi det bak desse tala står mange einskildpersonar som ønskjer å starte eit nytt liv. Arbeid er nøkkelen til å klare dette, seier Kristensen.

Han innser at Evje og Hornnes har ei ekstra utfordring på grunn av ein avgrensa arbeidsmarknad, men meiner likevel at det er muligheter.

-Me har eit godt opplæringstilbod, me har tatt fatt i utfordringane rundt låginntektsfamiliane, og me har eit lokalsamfunn som tar vel imot våre nye landsmenn. Men me må heller ikkje ta imot fleire enn me klarer å integrere på ein god måte, seier Kristensen.

Han meiner at Evje og Hornnes no bør sjå til dei kommunane som har greidd integreringa best, Asker i Akershus og Gloppen i Sogn og Fjordane.

Lokal intergreringsstrategi

No listar han opp krav som han meiner ordføraren bør instruere rådmannen til å utgreie nærare:

-

1.Oversikt over opplæringstilbodet til nyankomne flyktningar, m.a. innhaldet i introduksjonsprogrammet, samanlikna med tilsvarande kommunar med betre integreringsresultat enn Evje og Hornnes.

-

2.Få utarbeidd integreringsstrategi for Evje og Hornnes kommune, basert på regjeringa sin nye integreringsstrategi og erfaringar frå kommuner som har betre resultat.

-

3. Rådmannen skal inkludere klåre resultatmål for integreringsprogrammet i kommunen sin integreringsstrategi og den årlege målstyringa til kommunen.

-

4. Kommunestyret skal kvart år ta stilling til mottak og busetting av antall nye flyktningar. Då skal det ein har oppnådd i integreringsprogrammet vere ein styrande faktor, meiner Jan Kristensen.