Sikrar nærbutikken i Bjelland
Sjølv om Knut Tisland ønskjer å gi seg som handelsmann i Joker Bjelland, blir butikken driven vidare. Det vart klart på eit godt besøkt folkemøte i gymsalen på skulen nyleg.
Der vart det orientert om prosjektet som skal skape ny utvikling i bygda.
Selskapet Vekst Eiendom er eigar av buttikkbygningen, men Knut Tisland frå Laudal har hatt sitt eige driftsselskap i 12 år og vore dagleg leiar i butikken. No vil han over i anna arbeid, og Ida Therese Bjerland (28) er tilsett som ny dagleg leiar.
Artikkelen held fram under annonsen.
Ho tek til i jobb på butikken i desse dagar, men overtar leiarstillinga frå årsskiftet. Ho har m.a. bakgrunn frå ferskvareavdelinga på Eurospar på Hægeland, men er no busett på vestheia i Bjelland.
Har investert 1,5 mill.
-Butikken har i dag ei fin utvikling med årsomsetning på rundt 9 mill. kroner og med fleire bein å stå på, m.a. bibliotek, seier Odd Rolf Roland, dagleg leiar og styremedlem i selskapet Vekst Eigedom.
Selskapet som altså eig bygning og inventar i butikken, har i samarbeid med det statlege Merkur-programmet investert nesten halvannan million i utviklingstiltak i dei 12 åra som har gått.
Kjøpte industriområdet
No kjøper eigarane gjennom Kvimo Eiendom & Invest også driftsselskapet som Knut Tisland har hatt. Investeringsselskapet har som mål å utvikle næringslivet i Bjelland. Dette var også bakgrunnen for at selskapet for nokre år sidan også kjøpte Kvimoen industriområde der det tidlegare var byggevareforretning og bensinstasjon.
Bensinstasjonen er der framleis - og framstår som ein av dei rimelegaste drivstoffutsala i indre bygder. I tillegg har tidlegare ordførar Ånen Trygsland bygt ut eit velutstyrt varmesenter der. Rune Svendsen har overtatt verkstaden til base for si transportforretning.
Biblioteksuksess i butikken
Då Marnardal kommune ville legge ned bibliotekfilialen på skulen i Bjelland, fekk tidlegare ordførar Ånen Trygsland ei ”åpenbaring”. Kunne ein ikkje heller flytte biblioteket til daglegvarebutikken i Bjelland, tenkte han. Som tenkt, så gjort.
No er det tilsette i butikken som også tek seg av lånekundane på biblioteket. Med opningstid frå 9 til 18 kvar dag har boklånet gått i veret. Med nasjonalt lånekort kan bygdefolk, turistar og gjennomreisande låne bøker i Bjelland og levere dei inn att på Evje, i byen eller nær sagt kor som helst.
På toppen av det heile har daglegvarebutikken fått ei ekstra inntekt av bibliotekjobben.
Artikkelen held fram under annonsen.
Bruktbutikk
Bruktbutikken Melkerampa i eit hjørne i butikken har også vore med på å auke aktiviteten.
-Bygda ønskjer fleire barnefamiliar, gjerne som på Sveindal der forgubbing er snudd til optimisme, og bygda har fått eige hornorkester, seier Odd Rolf Roland i selskapet som er opptatt av å utvikle nærbutikken i Bjelland.
Utviklingsselskapet Vekst Eiendom i Bjelland er eit bygdeaksjeselskap med til saman 141 aksjonærar.
-Det viser at det er brei støtte i lokalsamfunnet for det utviklingsarbeidet som no er i gang, seier Odd Rolf Roland i selskapet.
Han meiner det sterke engasjementet frå bygda som har stilt så villig opp, har vore heilt avgjerande for vidare utvikling.
-Gjennom denne aksjeteikninga har selskapet fått billeg kapital for å ta utviklingsarbeidet m.a. i daglegvarebutikken vidare. Me tenkjer heile tida på utvikling, seier han.
Odd Rolf Roland fortel at det no er planar om å investere rundt 800.000 kroner i nytt inventar, ombygging og opprusting av kjøkkendelen i butikken. Det skal kome både varmdisk og panteautomat.
-Gjennom effektivisering kan personalet frigjerast til andre oppgåver, seier han.