Klar med E-avis og ny nettavis
Mange vil nok seie at det var på høg tid, og dei færraste vil la seg imponere av at også Setesdølen no tar steget over i den digitale verda. Frå 1. desember er me på nettet.
Det vil seie at me legg utSetesdølen som e-avis. Det betyr at du skal kunne lese heile papiravisa på nettet. Dessutan opprettar me eiga nettside på www.setesdolen.no (touch.setesdolen.no på mobil).
Der skal du finne stadige oppdateringar med lokalt nytt også mellom dei ordinære utgjevingsdagane for avisa. I første omgang er det digitale tilbodet gratis ut året, men på nettet vil nye lesarar finne det svært enkelt å bli abonnentar for neste år, berre med eit lite tastetrykk.
Artikkelen held fram under annonsen.
Styrke papiravisa
Overgangen no betyr slett ikkje at Setesdølen har planar om å avvikle papiravisa. Tvert om vil me styrke arbeidet med å lage ei så god papiravis som råd er, men av fleire grunnar meiner me tida er inne til å ta digitale muligheter meir i bruk enn det me har gjort til no.
Folk som betaler vanleg abonnement på papiravisa, får det digitale tilbodet i tillegg, men det skal også vere råd berre å velje den digitale løysinga.
Me trur også at mange annonsørar vil finne det interessant å bruke Setesdølen si nettside som annonseplatform. Utan å ta for sterkt i, er målsettinga vår at Setesdølen på nett nokså fort vil bli den best besøkte nettsida i Setesdal. Det bør bety noko for dei som vil nå folk her i dalen med bodskapen sin.
Me er klar over at det sikkert vil vere eitt og anna som må justerast etter at me har opna den nye nettsida. Difor ber me folk om å bere over med eventuelle glipptak. Me gler oss til det som skjer framover.
