Løyver 850 000 til Rygnestadtunet: – Farleg for besøkande

Hovudutvalet for kultur i fylkeskommunen løyver 850 000 kroner til restaurering av Rygnestadtunet i Valle. Behovet for vøling av bygningane er stort.

På grunn av stort behov for vedlikehald løyver Hovedutvalg for kultur, folkehelse og frivillighet i Agder fylkeskommune pengar til Rygnestadtunet.

– Agder fylkeskommune bevilger 850 000 kroner til Aust-Agder museum og arkiv IKS til istandsetting av Rygnestadtunet, lyder vedtaket.

Viktig nasjonalt kulturminne

Fylkeskommunedirektøren skriv i saksutgreiinga at Rygnestadtunet er viktig både for KULA (Kulturhistoriske landskap av nasjonal interesse) og UKL (Utvalde kulturlandskap i landbruket).

– Rygnestadtunet er eit viktig regionalt og nasjonalt kulturminne. I reiselivssamanheng og i synleggjering av UNESCO, UKL og KULA har staden ein viktig funksjon i formidlinga av Setesdalskulturen. Fylkeskommunedirektøren meiner derfor det er viktig at bygningsmassen blir bevart, står det i tilrådinga.

– Farleg for besøkande

Det vert også skrive om eit stor behov for vøling av bygningane.

– Treetasjeloftet har alvorlige skader på konstruksjonen. Laftestokkane som held bygninga oppe er knekt, slik at «loftet» står litt av fri vilje og pressar på konstruksjonar som ikkje er bygd for å tåle belastninga. Taket på bygningane er også i veldig dårlig stand, og det er fare for at stein og torv kan falle ned på besøkande. Stokkane som held torva på plass er delvis råtna heilt bort fleire stader. Situasjonen for bygningen er alvorlig om ikkje tiltak blir gjennomført som foreslått. Fylkeskommunens rådgjevarar ved bygningsvernsentra sluttar seg til at dette er eit kritisk behov, og at tiltak må prioriterast.